Blog

Indwi ya 5 ya Pasika : ku wa gatandatu

IGISOMWA CA MBERE

Ivyo dusoma mu gitabu c’Ibikorwa vy’Abatumwa (16, 1-10)

Muri irya misi, Pawulo aragenda i Derbe n’i Listra. Ashitseyo, ahasanga umwigishwa yitwa Timote, umuhungu w’Umuyudakazi yabaye umukristu, se na we akaba Umugereki. Benewabo bo muri Listra no muri Ikoniya baramushima kubera ivyiza yakora. Pawulo ashatse ko bajana na Timote abanza kumwatira amugira Umuyuda, kuko Abayuda bariho bari bazi neza ko se ari Umugereki. Aho baca mu bisagara, baza barabwira ababibamwo inama yashinzwe n’abatumwa be n’abakurambere bari i Yeruzalemu, bakabihanikiriza ngo bayikurikize. Uko ni ko amakleziya yakomera akongerekana uko bukeye uko bwije. Bashitse muri Aziya mu ntara ya Firijiya n’Ubugalati, Mutima Mweranda arababuza gukura ijambo ry’Imana mu kanwa. Bashitse ku nkiko y’intara ya Miziya, bagomba kuja i Bitiniya, Mutima wa Yezu arabamira. Baciye muri Miziya baja mu gisagara ca Torowasi. Mw’ijoro, Pawulo abonekerwa n’umuntu wo muri Masedoniya ahagaze amutakambira ati: «Jabuka, n’uze muri Masedoniya, udutabare!» Pawulo abibonye atyo, duca dufashako turora muri Masedoniya, kandi twari twajijutse ko ari Imana iturungitse kwigishirizayo Inkuru nziza.

IZABURl 99 (100) 1-2, 3.5

Icit.: Abari kw’isi yose, nimuvugirize Umukama impundu. Canke: Aleluya.

Yemwe abari kw’isi yose, nimuvugirize Umukama impundu, nimukorere Umukama n’akanyamuneza, muze mu nyonga ziwe muririmba.

Mumenye yuko Umukama ari we Mana: ni We yaturemye natwe turi abiwe, turi ingabo ziwe, turi intama zo mu busho bwiwe.

Erega, Umukama ni mwiza, urukundo rwiwe rwamaho, arakwiye kwemerwa mu myaka n’imyaka.

INKURU NZIZA

Aleluya.

Kristu yategerezwa kubabara no kuzuka mu bapfuye, kugira ngo yinjire mu buninahazwa.

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (15, 18-21)

Muri irya misi, Yezu yabwiye abigishwa biwe ati: «Isi niyabanka, mumenye ko yatanguye kwanka jewe. Iyo muba muri ab’isi, isi yokunze ivyayo; ico isi ibankira ni uko mutari ab’isi, ariko nabakuye kw’isi mu kubatora. Nimwibuke ijambo nababwiye: umusuku ntasumba shebuja. Nibaba barampamye, bazobahama na mwebwe; nibaba barazigamye ijambo ryanje, bazozigama n’iryanyu. Ego ivyo vyose bazobibagirira ku bw’izina ryanje, kuko batazi Uwantumye.»