Indwi irongora Noheli : ku wa 21 Kigarama
IGISOMWA CA MBERE
Ivyo dusoma mu gitabu c’ururirimbo rw’agakura (2, 8-14)
Ndumvise umukunzi wanje, ng’uyu araje, yisimbagiza ku misozi, atarika ku dutumba. Umukunzi wanje asa n’ingeregere, n’umwana w’impongo. Ng’urya inyuma y’uruhome, arunguruka mw’idirisha agacisha amaso mu myenge yaryo. Umukunzi wanje aranyagisha, ambwira ati: «Ingo se kiyago, nyumviriza, ingo. Kuko itumba ryahise, imvura yacitse icikirako. Amashurwe hanze arejeje, uturirimbo twiza tudusanganije ici, inuma yakoze mu gahogo kw’isi yacu. Umutenahi watanguye kwama, ibiti vy’imizabibu na vyo vyejeje birakwiza akamotera. Ingo se Kiyago nyumviriza, ingo. Kanuma kanje wihishije mu bitandara vy’amabuye, kandi wahungiye mu manga, nyereka uruhanga rwawe, unyumvishe akajwi kawe, kuko akajwi kawe koroshe. uruhanga rwawe narwo rukampimbara.»
Canke : IGISOMWA CA MBERE
Ivyo dusoma mu gitabu c’Umuhanuzi Sofoniya (3, 14-18a)
Muhimbare wa Siyoni, vuza impundu! Tamba utarike, Israyeli! Mwigeme w’i Yeruzalemu, himbarwa, umutima wûzuye akanyamuneza! Umukama yaragukijije urubanza rwari rukugeramiye, yaragukuyeko umwansi wawe. Umukama ni we mwami w’Israyeli araguhagarikiye: ntaco ucinona. Kuri uyo musi bazobwira Yeruzalemu bati: «Subiza umutima mu nda, Siyoni, ntucike inkokora. Umukama Imana yawe, ya ntwari mu rugamba, muri kumwe. Uzomutera agahimbare, urukundo rwiwe ruzogusubiza itoto; azokwiyereka, akuvugirize impundu, nko mw’isabukuru.»
IZABURI 32 (33) 11-12, 20-21
Icit.: Tererera impundu Umukama, mumuvyinire akavyino gashasha.
Shemeza Umukama mu nanga, mumucurarangire inanga y’imirya cumi;
mumuvyinire akavyino gashasha, muherezeko umurya wanyu muremeshe abakoma amashi.
Ivyo Umukama yategekanije vyamaho, ivyiyumviro vyiwe ntibihera na rimwe. Hahiriwe intara yamwironkeyeko Imana, hahiriwe intara We nyene yitoreyeko iragi.
Umutima wacu witeze Umukama, ni we mahungiro yacu, ni we nkinzo yacu; umushaha wacu uhimbarwa n’Umukama, izina ryiwe ni ryo twizeye.
INKURU NZIZA
Aleluya, aleluya.
Ingo, Ndongozi y’icibare cawe Israyeli: waraduhereye amategeko ku musozi wa Sinayi. N’uramvure amaboko yawe ngo uducungure.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (1, 39-45)
Muri irya misi, Mariya yarahagurutse agenda yihuta mu misozi, aja mu gisagara co mu Buyuda. Ashitse yinjira mu nzu kwa Zakariya, aramutsa Elizabeti. Elizabeti ngo yumve indamutso ya Mariya, umwana arakakaza mu nda. Elisabeti yuzuwe na Mutima Mweranda, aca ashira ijwi hejuru, ati: «Warahezagiwe mu bandi bagore, kandi n’umwana wibungenze arahezagiye! Mbega, iryo teka ry’uko nyina w’Umukama wanje aza kundamutsa, ndaritewe n’iki? Mbaye ncumva amajambo y’indamukanyo yawe, umwana mfise arakakaza mu mbanyi, akanyamuneza kariko karamusya. Eka urahiriwe, wewe wemeye ko iryo watumweko n’Umukama rizotaha!
MEDARD NKUNZIMANA 