IVYIBUKIRO BIGIZE IROZALI

IROZALI N’IVYIBUKIRO VYAYO

• Kw’izina rya Data n’irya Mwana n’irya Mutima Mweranda. Amen.

Inama y’Abatumwa

Ndemeye Imana Data Mushoboravyose, yaremye ijuru n’isi, na Yezu Kristu Umwana wiwe w’ikinege, Umukama wacu; yasamwe inda ku bwa Mutima Mweranda, avyarwa na Bikira Mariya; yababaye kuri Ponsiyo Pilato, abambwa ku musaraba; arapfa, arahambwa, agenda guhoza abantu beranda bari bapfuye; ku bugira gatatu yizura mu bapfuye; hanyuma yurira mw’ijuru, yicara iburyo bwa Mana Data Mushoboravyose; azogaruka guca urubanza rwa bose, abapfuye n’abazoba bakiriho.
Ndemeye Mutima Mweranda, n’Ekleziya Gatolika nyeranda, n’isangira ry’aberanda, n’ikigongwe abacumuye bagirirwa, n’izuka ry’abapfuye, n’ubuhirwe budahera. Amen
Dawe wa twese…
Mwaramutse Mariya (3)
Haninahazwe
Ewe Yezu mwiza,…

I. IVYIBUKIRO BINEZEREZA (ku wa 1 no ku wa 6)

Ica mbere : Umumarayika Gaburiyeli abwira Mariya ko azovyara Umwana w’Imana.
Dusabe umutima w’ukwemera ububi dufise.
Dawe wa twese…
Mwaramutse Mariya (10)
Haninahazwe
Ewe Yezu mwiza,…

Ica kabiri: Bikira Mariya agenda kuramutsa mwenewabo Elizabeti.
Dusabe umutima w’ugukundana.

Ica gatatu: Yezu avuka.
Dusabe umutima w’ukureka kwishinga ivy’itunga tubashe kwigana Yezu yashimye ubworo.

Ica kane: Bikira Mariya aja i Yeruzalemu ngo ahezagirwe, yongere ahereze Imana Umwana wayo.
Dusabe inema y’uguhorana umutima witeguye.

Ica gatanu: Mariya na Yozefu basanga Yezu mw’isengero ry’i Yeruzalemu.
Dusabe umutima w’ugukunda Imana kuruta vyose, n’ukwubaha abatugaba bose.

II. IVYIBUKIRO VY’UMUCO (ku wa 4)

Ica mbere: Yezu abatizwa hamwe n’abacumuzi muri Yorodani.
Dusabe umutima w’ukuzigama indagano z’ibatisimu: ukuri, urukundo n’umuvukano.

Ica kabiri: Yezu aremerwa kubera ubugeni bw’i Kana mu Bugalile.
Dusabe umutima w’urukundo mu ngo z’abubatse.

Ica gatatu: Yezu ahishuka abantu ko Ubwami bw’Imana bwabatashe.
Dusabe umutima w’uguheba ibicumuro n’impengamiro yavyo ngo turonke amahoro.

Ica kane: Yezu ahishurira abatumwa ubuninahazwa bwiwe ku musozi mweranda.
Dusabe umutima w’ukwihweza na ntaryo Yezu we nkingi y’ukwemera kwacu.

Ica gatanu: Yezu agira Ukaristiya n’Ubusaserdoti.
Dusabe umutima w’ukwihebera abandi n’uw’ukwama dukenguruka.

III. IVYIBUKIRO VY’AMAGORWA (Ku wa 2 no ku wa 5)

Ica mbere: Yezu ashaka kwicwa n’irungu n’amaganya ku gasozi ka Oliveti.
Dusabe umutima w’ukwigaya ngo twanke igicumuro.

Ica kabiri: Yezu arakubitwa.
Dusabe kudatinya guhana umubiri wacu, turinde n’ibitubabaza ku bw’Imana.

Ica gatatu: Yezu baramwicisha amahwa.
Dusabe ubukomezi ngo tubashe kwanka ubwishime bwose.

Ica kane: Yezu arikorera umusaraba.
Dusabe umutima w’ugushima ico Imana ishaka.

Ica gatanu: Yezu arabambwa.
Dusabe umutima w’ukwihebera Yezu, twiheka kuri Bikira Mariya.

IV. IVYIBUKIRO VY’UBUNINAHAZWA (Ku wa 3 no ku w’Imana)

Ica mbere: Yezu arazuka.
Dusabe umutima w’uguhaha dushobore kuba beranda.

Ica kabiri: Yezu arurira mw’ijuru.
Dusabe umutima w’ukwipfuza ijuru.

Ica gatatu: Mana Mutima Mweranda araza ku batumwa.
Dusabe umutima w’ukumenyesha Imana mu bantu.

Ica kane: Mariya ajanwa mw’ijuru.
Dusabe gupfa dukunda Imana.

Ica gatanu: Mariya araninahazwa mw’ijuru.
Dusabe umutima w’ugushiruka ubute mu bikorwa vyodushikana mw’ijuru.
“Haninahazwe”(3)

Turakuramutsa Mugabekazi, Nyina w’ikigongwe, wewe tugendako, wewe utunezereza, wewe twishimira. Turakuramutsa, turakuborogera, twebwe bicibwa bene Heva. Turakuganyira, twebwe twinihira, turira muri iyi si y’amarira. None rero Muvunyi wacu, n’uturabishe ya maso yawe y’ikigongwe, na Yezu, wa Mwana w’inda yawe ahezagiye, umutwereke wa musi tuzova muri ubu bucibwa, wewe munyakigongwe, wewe mwiza, wewe Bikira utekereza, Mariya.

Hariho abahora bongerako Amazina ya Bikira Mariya n’ibisabisho bijanye.

AMAZINA YA BIKIRA MARIYA

Mukama, tugirire ikigongwe.
Kristu, tugirire ikigongwe.
Mukama, tugirire ikigongwe.
Kristu, utwumve.
Kristu, udukundire.
Data wo mw’ijuru, Mana, tugirire ikigongwe.
Mwana, Mukiza w’abantu, Mana, tugirire ikigongwe.
Mutima Mweranda, Mana, tugirire ikigongwe.
Butatu Bweranda, Mana imwe, tugirire ikigongwe.

Mariya mweranda, dusabire.
Nyina mweranda w’Imana, dusabire.
Mubikira mweranda, akura ababikira bose, dusabire.
Nyina wa Kristu, dusabire.
Muvyeyi dukurako inema y’Imana, dusabire.
Muvyeyi utagira agahonzi, dusabire.
Muvyeyi mweranda rwose, dusabire.
Muvyeyi utamenye umugabo, dusabire.
Muvyeyi wavyaye udatyoye, dusabire.
Muvyeyi nyagukundwa, dusabire.
Muvyeyi w’agahimbare, dusabire.
Muvyeyi w’inama nziza, dusabire.
Nyina w’Umuremyi, dusabire.
Nyina w’Umukiza, dusabire.
Mubikira wigenza neza, dusabire.
Mubikira nyakwubahwa, dusabire.
Mubikira nyakuvugirwa, dusabire.
Mubikira utananirwa, dusabire.
Mubikira nyenikigongwe, dusabire.
Mubikira wazigamye ibanga, dusabire.
Karorero k’ubweranda, dusabire.
Ngerero y’ubukerebutsi, dusabire.
Wewe utunezereza, dusabire.
Ngoro ya Mutima Mweranda, dusabire.
Simbo ishemeye, dusabire.
Simbo imota ivy’Imana, dusabire.
Roza y’akayobera, dusabire.
Mugerero wa Dawudi, dusabire.
Mugerero usaruwe n’amasenge y’inzovu, dusabire.
Ngoro y’inzahabu, dusabire.
Shinguriro ry’Ubwuzure, dusabire.
Rembo ry’ijuru, dusabire.
Nyenyeri yo mu mutwenzi, dusabire.
Mukiza w’abamugaye, dusabire.
Bukiriro bw’abacumuye, dusabire.
Rumarantimba, dusabire.
Mutabazi w’abakristu, dusabire.
Mugabekazi w’Abamarayika, dusabire.
Mugabekazi w’Abasokuru, dusabire.
Mugabekazi w’Abahanuzi, dusabire.
Mugabekazi w’Abatumwa, dusabire.
Mugabekazi w’abishwe ku bw’Imana, dusabire.
Mugabekazi w’abemeye Imana, dusabire.
Mugabekazi w’Ababikira, dusabire.
Mugabekazi w’Aberanda bose, dusabire.
Mugabekazi utanduye igicumuro c’inyanduruko, dusabire.
Mugabekazi wurijwe mw’ijuru, dusabire.
Mugabekazi waduhaye irozari nyeranda, dusabire.
Mugabekazi w’amahoro, dusabire.

Mwagazi w’Imana, Wewe ukiza ibicumuro vy’abantu, turekurire Mukama.
Mwagazi w’Imana, Wewe ukiza ibicumuro vy’abantu, dukundire Mukama.
Mwagazi w’Imana, Wewe ukiza ibicumuro vy’abantu, tugirire ikigongwe.

Dusabire, Nyina mweranda w’Imana.

Bose: Tuberwe guhabwa ivyo Yezu Kristu yaturaganiye.

Dusabe:

Mana, Mukama wacu, turagusavye ngo uduhe, twebwe abawe, umutima umeze neza imisi yose, ukomeze n’umubiri wacu: Vyongeye, Mariya wa Muvyeyi Muhimbazwa, we yamye ari Umubikira, n’adusabire, adukize ubu irungu ryose, aturonkere n’ubuhirwe budahera. Amen.

• Kw’izina rya Data n’irya Mwana n’irya Mutima Mweranda. Amen.