Ijambo rishikirijwe na Nyenubweranda Papa Fransisko ku musi mpuzamakungu ugira 32 wahariwe abarwaye.

IJAMBO RISHIKIRIJWE NA NYENUBWERANDA PAPA FRANSISKO KU MUSI MPUZAMAKUNGU UGIRA MIRONGO ITATU NA KABIRI WAHARIWE ABAGWAYI

Igenekerezo rya 11 ruhuhuma 2024

« Si vyiza ko umuntu aguma ari wenyene » (Amamuko 2, 18) Kuvura umugwayi mu kwitwararika imigenderanire

Kuva mu ntango, Imana yaremye umuntu ngo abe mu bunywanyi, mu gushira muri we akaranga k’imigenderanire. Nuko rero, ubuzima bwacu, bwisunze Ubutatu Bweranda, buhamagariwe kwisanzura mu vy’imigenderanire, mu bugenzi no mu rukundo magiriranire. Twaremwe ngo tube hamwe, ntawaremewe kuba karadoga. Nico gituma uyo mugambi unyengetereye mu mutima wa muntu ku buryo uguhebwa, ubunyakamwe budutera ubwoba kandi burababaje, mbere butandukanye n’ubuntu. Bugaragara cane mu bihe vy’amagara make, vy’amadidane n’umutekano muke, kenshi bitewe n’indwara ihambaye.

Niyumviriye nk’akarorero, abisanze ari bonyene mugihe ca ca kiza ca covid-19: abarwayi batashobora kuronka uwubarengukako, hamwe n’abaganga n’ababafasha kuvura eka abo bose bakora kwa muganga, bose bakarengerwa, biyugaraniye mu vyumba vya bonyene. Ikindi tutokwibagira nabo bahanganye n’umwanya w’urupfu ari bonyene, bavurwa n’abakurikirana amagara y’abantu ariko bari kure y’imiryango yabo.

Mfatanije kandi umubabaro n’agahinda n’abo bose kubera intambara n’ingaruka mbi zayo bari ngaho batagira icepfo n’icaruguru: ingwano ni ingwara irenze, abantu bagoyagoya nabo akaba aribo bavyishura ku rugero rurenze.

Twobamenyesha y’uko mbere no mu bihugu bifise amahoro n’amikoro menshi, igihe c’ubusaza n’indwara, umuntu kenshi akibamwo mu bunyakamwe rimwe na rimwe yahebwe. Ako kamaramaza kenshi gaterwa n’inkurikizi y’umuco wo kwigungirako uhayagiza ubushobozi vyanka vyakunda, maze bigahuma amaso abantu ntihagire uwumvira impuhwe abatagishoboye kugendera kuri uwo muvuduko. Bica bicika umuco wo gutabwa “ntihagire uwuba akibona agaciro ntasubirizwa abantu bafise ngo basonerwe, bakingirwe cane cane abakene, canke abagendana ubumuga, canke abatarashobora gukora, nk’abana bataravuka canke badashobora gukora nk’abantu bageze mu za bukuru”

Ikibabaje ni uko iyo ngendo yibonekeza mu ma politike amwe amwe aho usanga agateka ka zina muntu katashizwe imbere ndetse n’ivyo umuntu akenera mu kubaho, ayo mahitamwo ya politike ntiyame anafasha igihe cose mu kwiyumvira ivya nkenerwa kugira ngo umuntu aronke ubwigenge ntasubirizwa mu vy’amagara yiwe n’ukwivuza. Muri ico gihe, uguhebwa kw’abantu b’amagara make n’ubunyakamwe bwabo biterwa kandi n’uko vyose babihindura mu gisata c’amagara y’abantu gusa kandi atagufashanya kuriho gushemeye “mu runani rwo kuvura” hagati ya muganga, umurwayi hamwe n’abo mu muryango wiwe.

Ivyo bica bidutuma dusubira kwiyibutsa iri jambo ry’Imana rigira riti: “Si vyiza ko umuntu aguma ari wenyene! Imana yabivumereye mu ntango y’irema maze ngo iduhishurire umugambi wayo ifitiye isi, ariko kandi, inkovu y’igicumuro cinjiye mu kuvyara imyikekano, isambuka, ugucanamwo n’ikumirwa. Ivyo birakurikirana umuntu mu migenderanire yiwe yose: n’Imana, na we nyene, n’abandi eka mbere n’ibiremwa vyose. Iryo kumirwa rituma dutakaza intumbero y’ukubaho, rikadutwara akanyamuneza n’urukundo bigahava bikadutera umutima w’ikumirana rirenze mu ntambwe zihambaye z’ubuzima.
Bavukanyi, ica mbere dukeneye iyo turi mu ndwara ni ukwitwararikwa kwuzuye impuhwe n’imbabazi. Kwitaho umurwayi bisigura ubwa mbere kwitaho imigenderanire yiwe yose: imigenderanire yiwe n’Imana, n’abandi – umuryango, abagenzi, abavuzi – , ibidukikije hamwe n’umurwayi nyene ubwiwe. Mbega birashoboka? Egome birashoboka kandi twese duhamagariwe kwitanga kugira ngo bishoboke. Turabe ishusho y’umunyasamariya w’ikigongwe (raba Luka 10, 25-37), uko yavyifashemwo mu kwegera mugenziwe, impuhwe yerekanye mu gukanda inguma za mwenewabo yariko arababara.

Twibukanye uku kuri shingiro ry’ubuzima bwacu: twaje ngaha kw’isi kuko hari uwatwakiriye, twaremewe gukunda, duhamagariwe kuba mu bunywanyi n’umuvukano. Iyo ngingo y’ubuzima iradushigikira cane cane mu bihe vy’ingwara n’amagara make kandi niwo muti wa mbere dutegerezwa gufata twese kugira dukize isi turimwo ingwara igwaye.
Kuri mwebwe murwaye, yaba ingwara ibayabaye canke idakira, ntimugire isoni ku cipfuzo canyu co kwegerana no kugira impuhwe! Ntimubihishe kandi ntimwiyumvire na rimwe ko mubereye abandi umuzigo. Ubuzima abarwayi barimwo budutumirira twese gufata akanya tukisuzuma uko turi.

Muri iki gihe c’amahindagu y’isi turimwo, twebwe abakristu duhamagariwe cane cane kurabisha amaso y’impuhwe nka Yezu. Twitwararike abababara kandi bari bonyene, boba baburagizwa kandi bahebwe. Twerekane urukundo Umukama wacu Yezu Kristu aduha mu gisabisho cane cane muri Ukaristiya, dukize ibikomere biterwa n’ubunyakamwe no gukumirwa. Kuri ivyo, dufashanye mu kurwanya ukwibako, ukutagira ico umuntu anerwa, ugutabwa kugira ngo umuco w’impuhwe n’imbabazi ugume usasagara.
Abarwayi, abagoyagoya, abakene nibo Ekleziya yitwararika kandi nabo nyene bategerezwa kuba umwitwarariko wa twebwe twese ibiremwa muntu n’impuhwe tubereka. Ntituvyibagire! Twiheke ku Muvyeyi wacu Bikira Mariya, we Bukiriro bw’abarwaye, atwambarize kandi adufashe kuba abaharanira imigenderanire no kwiyegereza abandi.
Bigiriwe i Roma, ku cicaro c’umweranda Yohani w’i Laterano, igenekerezo rya 10 nzero 2024

Papa Fransisko