Indwi ya 14 yo mu mwaka : ku wa gatanu (Années paires)
IGISOMWA CA MBERE
Ivyo dusoma mu gitabu c’Umuhanuzi Ozeya (14, 2-10)
Ng’iri iriyazwe n’Umukama: Israyeli we, garuka ku Mukama, Imana yawe, kuko waguye mu rudubi kubera ibicumuro vyawe. Gira amajambo y’ukumuzamba mu kuri, uheze ugaruke ku Mukama. Umubwire uti: «Nkurako ivyaha vyanje, akira iciza. Mu gishingo c’ibimasa, tuzogushikanira ishikanwa ry’ibisabisho vyacu. Ashuri ntiyoshobora kudukiza, ntituzosubira kugendera ku mafarasi, ntituzosubira kubarira ivyakozwe n’intoke zacu, tuti: Muri imana zacu, kuko kuri Wewe ari ho impfuvyi ibonera imbabazi.» Nzobakiza ubuhemu bwabo, nzobakunda urukundo rw’igishika, ishavu ryanje riraheze rwose. Israyeli nzoyibera nk’urume, na yo azoshurika nk’amashurwe y’amalisi, ishinge imizi nk’ibiti vy’i Libani. Amashami yayo azosagarara, ubuninahazwa bwayo bumere nk’ubw’igiti c’umuzeti, akamotera kayo na ko kamere nk’akamotera k’i Libani. Bazogaruka kuruhukira mu gitutu cayo, basubire kubiba ingano. Bazoshurika nk’imizabibu babe rurangiranwa nk’umuvinyu wo muri Libani. Efurayimu, izovuga iti: «Ibigirwamana ndacabironderako iki?» Mbona ari Jewe ndayumviriza, nkayihangaza. Jeho, meze nk’igiti c’isederi gitotahaye, akaba ari jewe ndayiha kwama ivyamwa vyinshi. Ni nde azi ubwenge bwo gutegera ivyo vyose, ni nde afise ubukerebutsi bwo kubizirikana? Erega na none, inzira z’Umukama ziragororotse, abantu b’intungane barazigenderamwo, abanyakibi na bo barahaca bakahasiga agahanga.
IZABURI 50 (51) 3-4, 9-10, 12-13, 14.17
Icit.: Nzoshemeza ubuninahazwa bwawe!
Ngirira ikigongwe, se Mana yanje, kubera ubuntu bwawe, ku bw’ikigongwe cawe kidakama nzimanganiriza akabi nakoze. Nyuhagira umwanda wose mfise, uheze uhanagure ibicumuro vyanje vyose.
Ntyorora nsigare nsa n’irirenga, nyuhagira nsigare nsumvya inyange kwera. Nsubiza agahogo k’ikinezero c’umusi mukuru, igufa wari wavunaguye rivyine ritarike.
Mukama, nshiramwo umushaha w’indanga, ugushaka kwanje na kwo ukuremeshe kwame kukwihambiriyeko. Ntunshibure ngo nkuve mu maso, ntera iteka riho ungumizemwo ubwiza bwawe.
Ndaba ryiza nka kera mpimbawe, kandi ndokoza ugushaka gutegêra, sinzokwiyonkore. Mukama mfatanura umunwa, mbashe gushemeza ubuninahazwa bwawe.
INKURU NZIZA
Aleluya, aleluya.
Nimwazigama ijambo ry’ubuzima, muzoba isôko ry’umuco wakaka kw’isi.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Matayo (10, 16-23)
Muri irya misi, Yezu yabariye abatumwa biwe Icumi na babiri ati: «Ndabatumye nk’intama mu mfyisi; muritegereze nk’inzoka, muce bugufi nk’inuma. Yamara mwame mwibanga abantu, kuko bazobakwegera mu manza, bakabakubitira mu masinagoga yabo. Bazobajana imbere y’abatware n’imbere y’abami muhorwa jewe, muja kunyemera imbere yabo n’imbere y’abanyamahanga. Yamara umusi babakweze, ntimwiganyire mwibaza ico muza kuvuga; ico muza kuvuga muzoca mukironka ako kanya nyene; kuko atari mwebwe muzovuga, ari Mutima wa So wanyu azobavugiramwo. Umuvandimwe azotanga mwenewabo ngo bamwice, umuvyeyi atange umwana, abana bagararize abavyeyi babo babicishe; muzokwankwa na benshi, ari izina ryanje abahora. Yamara uwutazotirigana gushika apfe, ni we azokira. Umusi babatujije muri iki gisagara, murahungire mu kindi. Ndababariye ni ivy’ukuri, Umwana w’umuntu azoshika mutarakwira ibisagara vy’Israyeli.
MEDARD NKUNZIMANA 